MCB ta inisiá proseso fásil i grátis pa remplasá tarheta di débito i krédito personal i di negoshi ku ta deteriorá

Kralendijk - Maduro & Curiel’s Bank (Bonaire) N.V. ta inisiá un proseso fásil i grátis pa remplasá tur tarheta di débito i krédito personal i di negoshi ku ta deteriorá, pa klientenan di Bonaire, Sint Eustatius i Saba.

E kalidat di e tarhetanan ku nos a distribuí, lamentablemente no ta kumpli ku loke nos klientenan ta spera di nos. Nos ta den kòmbersashon ku fábrika tokante esaki. Nos ta pidi nos diskulpa pa e inkumbiniensia ku esaki a trese pa nos klientenan i ta spera ku e proseso rápido di remplaso di e tarheta deteriorá ta eliminá esaki.

Entrante 20 di òktober 2025, Maduro & Curiel’s Bank Bonaire ta inisiá un proseso fásil i sin gastu pa tur kliente ku tin un tarheta deteriorá.

E inisiativa aki ta konta pa tur kliente ku tin un tarheta di débito òf krédito personal i di negoshi ku a deteriorá. E proyekto ta start na MCB Bonaire (pa klientenan di Bonaire, Sint Eustatius i Saba) i nos ta sigui ampli’é den fase pa tur kliente di MCB Group (Kòrsou, Aruba i St. Maarten).

Durante e lunanan benidero tur kliente ku ta deseá di remplasá nan tarheta di débito òf krédito, por hasi esaki hasiendo uso di un di e siguiente 3 métodonan simpel:

• Via MCB Mobile Banking App
• Via Contact Center
• Ku bishita personal na un Brènch

E kliente tin e opshon di skohe pa hasi entrega di tarheta na su adrès registrá na Banko òf pasa buska su tarheta na brènch. Kliente ku skohe pa buska e tarheta na brènch, ta risibí un email ku indikashon di fecha ku e por pasa buska su tarheta. E proseso di remplaso ta dura un máksimo di 2 siman.

Durante e proseso di remplaso, bo tarheta aktual ta keda aktivo, pues bo por sigui hasi bo transakshonnan bankario. Na momentu ku e kliente risibí e tarheta nobo i aktivá esaki, por fabor distruí i deshasí di e tarheta bieu.

Klientenan por remplasá nan tarhetanan deteriorá te dia 28 di febrüari 2026. Na final di e periodo aki Banko ta evaluá si ta nesesario pa ekstendé esaki.

Pa mas informashon en konekshon ku remplaso di bo tarheta, por fabor tuma kontakto ku nos na: 715 5520 òf via email na: customer.support@mcbbonaire.com òf chat via nos wèpsait: www.mcbbonaire.com.

Ku e inisiativa aki MCB ta reafirmá su kompromiso pa sigui ofresé servisio bankario ku fasilidat i seguridat. Nos ta balorá e konfiansa di nos klientenan i ta sigui traha kontinuamente pa mehorá nos produkto i servisionan.

20 di òktober 2025